Sick again

剛剛先好番兩星期，兩寶寶又再病倒了。BB 只是輕微的流鼻水，但EB就如上次一樣發燒，嘔吐，咳咳及勁流鼻水。至慘佢最唔鍾意俾人攪塊面，所以要同佢clean up 鼻水口水時，簡直要同佢搏鬥一番。 佢一見我攞住張tissue，佢就立時"走路"避開，cry n cry，雙手勁推開我。咁啱佢發燒當日我買了一個新的 ear thermometer,估唔到即刻用得著。以往用普通thermometer，佢十分嘅唔喜歡，好難同佢量度體溫，所以便嘗試轉用 ear thermometer。起初佢亦都阻止我，但用多幾次後，佢終於乖乖的順服，總算無買錯嘢。這兩天與他有太多的搏鬥，又唔肯瞓，我應該話佢想瞓但又瞓得唔好，所以我同佢都很辛苦。

同時BB 又扭計。又話佢都病都要食葯，又哭著話細佬食哂佢啲葯。一個就勁鍾意食葯（BB)；另一個就好討厭食葯(EB)。當然又要同BB解釋一番，佢仍然扭著要食葯。最後我同佢講，病了唔可以食朱古力，佢立時收了聲，不敢再嘈（事關那天晚上在她扭計之前，我剛給了她一粒朱古力哄她）。

這兩晚不單要經常起身去check 吓EB的體溫；另一方面BB 半夜又叫醒、哭醒，有時天未光，叫我幫佢蓋被（佢其實自己識做，但就鍾意叫人做）。蓋被後半個鐘，佢又話瞓醒了要起身（比平常起床時間足足早了一個鐘）。攪咩呀？攪到我無覺好瞓！有時我倦到不能理佢，便叫佢自己在房內睇書，有時佢睇睇吓又瞓番；有時佢又唱歌又講嘢。個baby monitor 全接收晒佢啲歌聲到我房內，真係人都顛啦！